॥ आत्मनां उद्धरेत् आत्मानम् ॥

New Resolution India संस्थेचे कार्यकर्ते वस्त्यांमध्ये घरोघर जाऊन अठरा ते पंचवीस या वयोगटातील मुले, तरूण व तरुणी ज्यांचे शिक्षण दहावी नंतर थांबले आहे किंवा शिक्षणात खंड पडला आहे अशांची भेट घेतात. अशा मुलांच्या सर्वांगीण विकासासाठी ‘युथ डेवलपमेंट ट्रेनिंग सेंटर’ या माध्यमातून ही संस्था काम करते. त्यांच्यासाठी व्यक्तिमत्व विकास, करीयर निवडण्यासाठी योग्य मार्गदर्शन करणे, त्यांच्यातील सुप्त गुण ओळखून रोजगार मिळविण्यासाठी उपयोगी पडेल अशी कौशल्ये विकसित करणे ही कामे ही संस्था करते. मुलांच्या पालकांच्यातही त्यासाठी पोषक वातावरण तयार करते. केवळ शिक्षण देऊन ही संस्था थांबत नाही तर त्या तरुणांना अनुभवासाठी इंटर्नशिप व नोकरी मिळवून देण्यासाठीही प्रयत्न करते.

या संस्थेची स्थापना २००९ साली झाली. आणि २०१४ पासून पूर्ण स्वरूपात कार्यरत आहे. आजपर्यंत संस्थेची ९ केंद्रे आहेत. १४ शाळा, १७ समुदाय केंद्रे या माध्यमातून ही संस्था १३ हजारांवर मुलांसोबत यशस्वीपणे काम करीत आहे.

आपल्या मूकबधिर विद्यालयातील विद्यार्थ्यांना पुढील वाटचालीसाठी या संस्थेचा उपयोग व्हावा तसेच आपल्या आजूबाजूला असलेल्या वस्त्यांमधील मुलांना, तरुणांना याचा लाभ मिळावा या दृष्टीने अुत्कर्ष मंडळाने या संस्थेचे एक केंद्र मंडळाच्या जागेत सुरू करण्याचा निर्णय घेतला. तळघरातील जागा त्यांना देण्यात आली आहे. टेक् महिंद्र ही कंपनी आपल्या शाळेप्रमाणेच याही संस्थेचा आधारस्तंभ आहे. आर्थिक व्यवस्था त्यांच्यातर्फेच करण्यात आली आहे. आपल्या मूकबधिर विद्यार्थ्यांसाठी खास शिक्षकही संस्थेने नेमले आहेत.